غزل کی مقبولیت کے اسباب

میر اقبال  

 غزل عربی زبان کا لفظ ہے جس کے لغوی معنی "عورتوں سے باتیں کرنا" یا "عورتوں کی باتیں کرنا" ہے۔غزل شاعری کی ایک ایسی صنف ہے جو عربی ادب سے آئی ہے۔ یہ ایک مخصوص ہیئت (form) کی حامل ہوتی ہے، جس میں ہر شعر اپنے آپ میں مکمل ہوتا ہے اور ایک الگ موضوع رکھتا ہے۔ غزل میں عموماً عشق، محبت، درد، اور فلسفیانہ خیالات کا اظہار کیا جاتا ہے۔

شاعری میں اس کا استعمال ایک مخصوص صنف کے طور پر ہوتا ہے۔ غزل میں ایک خاص وزن اور بحر کا استعمال کیا جاتا ہے، اور اس کا پہلا شعر "مطلع" کہلاتا ہے، جس کے دونوں مصرعے ہم قافیہ اور ہم ردیف ہوتے ہیں۔ غزل کا آخری شعر جس میں شاعر اپنا تخلص استعمال کرتا ہے، "مقطع" کہلاتا ہے۔

   غزل اردو زبان کی سب سے مشہور و مقبول صنف سخن ہے۔ اردو کے پہلے شاعر امیر خسرو کے زمانے سے لے کر آج تک اردو غزلیں مسلسل لکھی جاتی رہی ہیں اور مشاعروں کی زینت بنتی رہی ہیں۔ غزل بنیادی طور پر ایک داخلی صنف سخن ہے یعنی اس میں شاعر اپنے دل پر بیتی ہوئی کیفیات و واردات کو بیان کرتا ہے۔
     غزل کا ہر شعر ایک اکائی کی حیثیت رکھتا ہے یعنی اس کے ہر شعر میں ایک مکمل مضمون بیان ہوا ہوتا ہے۔مثلاً  ولی کا یہ شعر ملاحظہ فرمائیں؎

مفلسی سب بہار کھوتی ہے

مرد کا اعتبار کھوتی ہے

    اردو شاعری کے ذمرے میں غزل کے علاوہ قصیدہ، مرثیہ، نظم اور مثنوی وغیرہ بھی آتے ہیں لیکن جو مقبولیت غزل کو حاصل ہے وہ کسی اور صنف کو نصیب نہ ہو سکی۔ اس میں شک نہیں کہ اردو کے کچھ تنقید نگاروں نے غزل کو اپنی تنقید کا نشانہ بھی بنایا؛ جیسے حالیؔ نے کہا کہ غزل سے سنڈاس کی بو آتی ہے، کلیم الدین احمد نے غزل کو نیم وحشی صنف سخن قرار دیا، عظمت اللہ خان نے کہا کہ غزل کی گردن بے تکلف اڑا دینی چاہیے۔ لیکن ایسی شدید مخالفت کے باوجود بھی غزل کی عظمت و مقبولیت میں کوئی کمی نہ آئی اور غزل نے اپنی عظمت کا ایسا احساس دلایا کہ آج کوئی بھی شخص اس عظیم صنف سخن کے خلاف لب کشائی کی جرأت نہیں کر سکتا۔ موجودہ دور میں غزل کی اس مقبولیت و عظمت کے کئی راز پوشیدہ ہیں جن کی تفصیل درج ذیل ہے۔
    غزل کی مقبولیت کا سب سے بڑا راز اس میں عشقیہ مضامین کا برتنا ہے اور عشق وہ جذبہ ہے جس سے کوئی بھی دل خالی نہیں۔ عشق دو طرح کا ہوتا ہے۔ عشق مجازی اور عشق حقیقی۔یہ دونوں غزل کے اہم موضوعات ہیں۔عشقیہ جذبات کو بہترین الفاظ میں ایک شعر یا دو مصروں میں بیان کرنے کا ہنر غزل میں موجود ہوتا ہے ۔یہ  جگر مرادآبادی کا شعر دیکھیے؎

یہ عشق نہیں آساں اتنا ہی سمجھ لیجے

اک آگ کا دریا ہے اور ڈوب کے جانا ہے

     غزل کی مقبولیت کا ایک سبب یہ بھی ہے کہ غزل آسانی سے کہہ لی جاتی ہے۔ جو شخص ذرا سا بھی موزوں طبع ہوگا غزل کہہ لے گا۔
    غزل کی مقبولیت کا ایک سبب غزل کا انداز بیان ہے جو دل ہی میں نہیں اترتا بلکہ حافظے پر بھی نقش ہوجاتا ہے۔ بہترین شعر ایک طور پر وہ ہے جو ضرب المثل بن جائے۔ سہل ممتنع بھی اس کا ایک پہلو ہے۔ کسی شاعر کے مقبول ہونے کا ایک سبب یہ ہے کہ اس کے کتنے اشعار زبان زد ہوگئے۔ کسی تجربے یا حقیقت کو ایک یا دو مصروں میں اس طرح سمو دینا کہ زبان، ذوق و ذہن سب کی کسی نہ کسی حد تک سیرابی ہو جائے، کوئی معمولی کام نہیں۔ اردو والے بات بات پر شعر پڑھتے ہیں اسے آپ جو چاہیں کہہ لیں اس کا سبب یہی ہے کہ غزل نے ہر موقع کے لئے برمحل اشعار اس کثرت سے فراہم کر دیے ہیں کہ ان کا بے اختیار زبان پر آتے رہنا کوئی تعجب کی بات نہیں۔
   غزل کو محبوب مقبول بنانے میں مشاعرے، رزم و بزم کی محفلیں، تحریر و تقریر میں برمحل اشعار کا استعمال اور اس طرح کی دوسری تقریبیں بہت زیادہ کارآمد رہی ہیں۔ غالباً کسی اور معاشرے میں اچھے اشعار کی اتنی زبردست طلب محسوس نہ کی جاتی ہو گی جتنی اردو سماج میں کی جاتی ہے۔ پروین شاکر کا مشاعرہ میں سنایا گیا شعر ملاحظہ ہوں؎

وہ تو خوش بو ہے ہواؤں میں بکھر جائے گا

مسئلہ پھول کا ہے پھول کدھر جائے گا

     غزل کہنے میں سہولت ہے اور اتنی ہی دقت بھی کہ جو بات کہنی ہوتی ہے مختصر سے مختصر الفاظ میں جلد سے جلد کہہ کر ختم کر دی جاتی ہے۔ یہ چند الفاظ میں بڑی بات یا ایک موضوع کہہ دینا  غزل کی مقبولیت کا ایک اہم سبب ہے۔اسی ضمن میں یہ شعر دیکھیے؎

ہے کچھ ایسی ہی بات جو چپ ہوں

ورنہ کیا بات کر نہیں آتی

غزل میں موضوعات کی کوئی کمی نہیں ،دنیا کے کسی بھی موضوع پر غزل گو شاعر غزل کہہ سکتے ہیں۔غزل کی مقبولیت کا یہ ایک اہم سبب ہے۔

SHARE

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.

• 
• 
• 
• 
•